SA DULO NG INDEX FINGER

Mga Tula ni Arjanmar H. Rebeta

FILIPINO GHOST FIGHTERS

Gusgusin na ang lipunan

Gugustuhin mong lipulin

ang mga

Ghost projects

Ghost employees

Ghost beneficiaries

Ghost students

pati ang mga

katakot-takot

na mga kurakot

pulitiko, kontratista

pati na ahensya.

Kaya nga ang imbestigasyon

nagmumukha lamang ghost.

Sila-sila nag-iimbestigahan

O nagtatakipan.

Pakitang-tao

Pakitang-multo.

Sa bawat tanong nila, kabado

Baka lumitaw ang sariling multo.

Magnanakaw sa kapwa magnanakaw

Halimaw sa kapwa halimaw.

Multo ba ang may hawak ng katarungan

O ang mga minumultong mamamayan.

Ang pagpapatuloy ng kahirapan

ang pinakamalaking kababalaghan

subalit ang mga ito

ay multo rin ng ating mga boto.

Kaya ang pinili ng ating index finger

Magtatapos sa ating index finger.

Sapagkat tayo ang mga Ghost Fighters!

Ihanda na ang Spirit Gun at Demon Gun

Itumba ang mga halimaw ng bayan!

Spirittttttt Gunnnnnnn!!!!!!!!!!!!!!!

LILA SA KUKO NG HINTUTURO

Ngayong araw,

Lila ang kulay ng kuko ng hintuturo

Mayroong karapatang magturo

Kung sino ang nararapat mamuno.

Ngayon,

Lila rin ang kulay ng bayad

Inilalatag sa mga pobreng palad

Para ituro ang hindi nararapat.

Kinabukasan,

Lila ang kulay ng naibentang panahon

Ang araw ay laging nakalutang sa dapithapon

Naghihingalo sa pag-asam ng pag-ahon.

Sa sumunod na linggo,

Lila pa rin ang kulay ng kuko ng hintuturo

Pinupukpok ng martilyo at bakal na kamao

Habang patuloy syang dinuduru-duro.

Taon na ang nagdaan,

Lila ang kulay ng sinampal na dangal

Binigyan dati ng karapatang maghalal

Subalit mas pinili ang magsugal.

Talo na ang nagdaan,

Lila na ang kulay ng pinalong balat

Mas pinili na itihaya ang palad

Kumpara itikom at magturo ng dapat.

Taon na ang nagdaan,

Lila na ang kulay ng buong hintuturo

Nagmistulang talong sa kakatanong sa pinuno

Walang masisi, kundi sarili, tinuturo, dinuduro.

Halalan muli,

Lila ang tinta na naghihintay sa presinto

May karapatan muli ang hintuturo na magturo

O pipiliin muling madurog o maduro.

Lika muli,

Lila ang kulay ng lungkot at paghina

Lila ang kulay ng karapatan at pwersa

Lila, o pangungulila, pumili ka!

BINGING MALAKAS ANG PANDINIG

Isang gabing payapa

Nakatago ang mga tunog sa dilim

Hanggang sa dumating ang isang binata

At umupo sa kababatuhang malambing.

Katabing sapa ay nahihiya

Hindi maiagos ang kanyang tubig

Tahimik pati mga isda

Hindi makasayaw ‘pagkat walang himig.

Hanggang sa isang ibon ang naghawi

Sa kapalibutang napipipi

Ibig magpapansin sa binatang tulala

Na tila nag-iisip ng malalim na tula.

Tainga n’ya ay nabuksan

Tibok ng puso n’ya’y  naramdaman

Maging ang mga nakapalibot na nilalang

Na agad-agad ring nagsiingayan.

Agad-agad na nabuhayan ang binata

Ang kanyang pagkapipi ay tumila

Mga tunog sa palibot ay kinilala

Kahit ang hilik ng mga kutong lupa.

(Mga tunog sa palibot) (Ang bulong ng binata)

Korokok…kok, korok..kok… -Bato-batong namamasyal sa masukal na talahiban.

Tagkroo…, tagkroo… -Tagkarong nanliligaw sa gitna ng dilim.

Kirikik-kik, kirikik-kik… -Paniking naghahanap ng matatakot.

Wak…, wak… -Uwak na nag-aabang ng mahahablot.

Howh…, howh… -Kwago na nag-aabang ng dalaga.

Tuk-ko…, tuk-ko… -Tuko na ‘di mapakali sa kalasingan.

Sheeeh…, sheeeh… -Lamok na nag-aalok ng pag-amok.

Kokak…, kokak… -Palakang namamayagpag pa ang dila.

Tikitik…, tikitik… -Butiking nagbabalasa ng hibla sa sagingan.

Toktoraok…, toktoraok… -Manok na sumisigaw, tama na ‘pagkat umaga na.

Toktoraok…, toktoraok…

Paulit-ulit na ang manok.

Kaya naman sila ay humupa

Hanggang isang grupo naman ang nagpasimula.

(Mga tunog sa palibot) (Ang bulong ng binata)

Woooh…, woooh… -Hangin ay bumubulong at yumayakap sa akin.

Bork! -Batong natipyas, nahulog sa tubig 

Dork…, dork…, dork… -Tulo ng tubig mula sa aking paa, kumikiliti sa akin.

Kirk…, kirk… -Kawayang nabibinat at sa aki’y humahalik.

Biglang nawala ang mga ingay

Na tila nagbigay daan sa paparating na sigaw

Tunog nito'y iba sa iba

Subalit di naiiba sa kanya.

(Mga tunog sa palibot) (Ang bulong ng binata)

“Tabang! Tabang!” (Tulong! Tulong!) ...

“Sa siisay man na yaon d’yan” (Sa sinumang nand’yan) ...

“Tabang! Tabang!” (Tulong! Tulong!) ...

“Sa mga nakakadangog! (Sa mga nakakarinig) ...

Ang sigaw ay lalo pang lumakas,

Mga hintuturo ng binata'y itinaas

Dulo nito'y itinakip sa butas

Ng taingang may pandinig na ubod ng lakas.

“Tabang! Tabang!”

“Abang! Abang!”

“Bang! Bang!”

Ito ay lahok sa Saranggola Awards 2025.